Bloggið búið

Allt hefur sinn tíma. Miðað við hvað maður bloggar orðið sjaldan sjálfur og er orðinn latur að lesa bloggsíður annarra þá er sá tími kominn hjá blogginu. Blogg er búið. Bloggið hefur einkenni alls þess versta sem netið býður uppá, offramboð, aftökur án dóms og laga og kaos.

Það er því tímabært að taka sér blogghlé árið 2009, ja nema eitthvað sérstakt komi uppá og bloggið verði málið. 


Að vera hluti af þjóð sem tekin er í rassgatið

Það er skrítin tilfinning. En auðvitað er það ekkert annað. Varnarlaus almúgi horfir auðmkunarverður á meðan bitunum er deilt út meðal útvalinna. Klinkið er sogað úr vösunum og alltaf er þetta augnarráð hundsins, þetta biðjandi augnaráð um mola af borðinu. En svo er kakan búin og hundinum hent út í frostið og kuldan, éttu það sem úti frýs á meðan ég hlýja mér.

Þetta er samt svolítið merkilegt af því að ég man varla annað en þessi þjóð hafi verið stórskuldug alla mína tíð, skattarnir fóru í að greiða niður vexti af erlendum lánum. Loksins tókst að greiða þessi lán niður en með hverju? Lánsfé, sem hét eitthvað allt annað. T.d. vafningar eða hlutabréf í Sterling. Svo við erum sumsé ennþá stórskuldug? O, jæja. Best að halda bara áfram sínum vanagangi.

En allt sem fullorðna fólkið í kringum mig hefur sagt stendur ennþá, maður á að safna fyrir því sem mann langar í, peningar verða ekki til úr engu, og undir það síðasta, þetta á allt eftir að fara á hausinn.

Stjórnmál og fjölmiðlar á Íslandi eru í raun bara hlægileg. Það éta allir hvað upp eftir öðrum. Fréttir eru búnar til handa okkur bláeygum bjánunum, það eru viðtöl við allskyns pótintáta sem hafa skoðanir en vita ekkert. Og það voru fréttir dagsins, dag eftir dag. Egill Helgason tekur viðtöl við sama fólkið, aftur og aftur. Við erum jú svo fá. Það eina sem uppúr stendur er Gufan. Þar er á köflum útvarpað sínfóníutónleikum og leikritum, upplestur á sögum, eitthvað svo gróið. 

Ég held við verðum afar fljót að gleyma þessu með gildin. Hin góðu gildi, þolinmæði, kærleikur, umhyggja, nægjusemi, umburðarlyndi. Þetta er okkur ekki áskapað. Maðurinn er í eðli sínu ágjarn, gráðugur, grimmur, eins og minkurinn, sem drepur miklu meira en hann étur. Þetta snýst um djúpt siðferði, sem samfélag innrætir sér á löngum tíma. Að taka ekki of mikið. Bera umhyggju fyrir náunganum. Sýna fjölskyldunni kærleika, gefa henni tíma, miðla og þiggja. Við erum alin upp við aðstæður þar sem verðmæti eru af okkur tekin. Það elur á ótta og ágirnd. Við erum alin upp við óréttlæti og misskiptingu. Við það verður til öfund. 

Auðvitað verður aldrei til fullkomið samfélag. En að halda að græðgi sé góð er svo sorglegt. Að hún haldi hjólunum gangandi. Það þarf ekki græðgi. Hagvöxtur er enginn mælikvarði. A.m.k. ekki á lífsgæði. Hann er kannski mælikvarði á græðgi. En það éta allir bullið upp hver öðrum.

Hugsa vel um börnin og temja þeim góða siði. Um það snýst lífið. 


Ökologisk - lífrænt

Með hliðsjón af hækkandi áburðarverði, eitthvað hlýnandi veðurfari og frekar döpru ástandi í sauðfjárrækt ættu sauðfjárbændur að skoða þennan möguleika betur. Fæstir þeirra gera sér grein fyrir hvað í þessu felst en almennt í lífrænni ræktun verður til gríðarlega verðmæt þekking þar sem bændur eru að prófa sig áfram með nýjar lausnir, ný áburðarefni, betri nýtingu lífræns áburðar, nýjar sjúkdómavarnir og breytta meðhöndlun dýra og plantna. Nokkrir bændur hér á landi búa í dag yfir þekkingu sem ætti að nýtast öðrum til að skipta yfir.

Hitt er svo annað mál að t.d. í Bretlandi hefur eftirspurn eftir lífrænt ræktuðum vörum dregist saman á síðustu og verstu tímum.

Og að síðustu þá hefur mér alltaf fundist að kalla þessa tegund landbúnaðar "lífræna" mjög skrítið. Mér hefði þótt t.d. visthæfur eða vistbær landbúnaður betri, einkum m.t.t. þess að þetta snýst ekki bara um eitthvað lífrænt heldur vist almennt þ.e. vist dýra og vistkerfi sbr. danska heitið, ökologisk.  


mbl.is Hærra verð fyrir lífrænt
Tilkynna um óviðeigandi tengingu við frétt

Milt haust

Ég fór snemma af stað í vinnuna í morgun, fáir á ferli og góðlátleg rigning sem lék um bera fótleggina. Vindur hefur verið af blessunarlega skornum skammti í sumar a.m.k. í mínum hjólaferðum til og frá vinnu. Síðasti föstudagur undantekning þegar maður fann virkilega meðvind á leið til vinnu. Sviptivindar á brúnni yfir Miklubraut og síðan aftur yfir Kringlumýrarbraut. Heimleiðin var erfiðari, var 10 mín lengur en venjulega.

Á leið minni í gær og í morgun var mér hugsað til þess sem Kári Harðarson bloggaði um ekki alls fyrir löngu um manninn sem mátti skyndilega ekki hjóla á Reykjanesbrautinni. Hjólreiðamenn eru ekki mikils metnir í umferð hér á landi, einkanlega í því er lýtur að hönnun hjólreiðastíga eða vega og síðan þegar e.k. framkvæmdir eiga sér stað við hjólreiðastíg eða veg. Þá er helst ekki gert ráð fyrir að hjólandi eigi þess kost að komast um. Oft á tíðum hverfa heilu gangstéttirnar, sem eru eini valkosturinn á löngum köflum til að hjóla á, 90° beygjur sem ekki er nokkur leið að ná með góðu móti og erfitt getur verið að hjóla upp á kantsteina.

En, ég er ekki frá því að hjólreiðafólki hafi fjölgað talsvert í sumar. Þrýstihópurinn gæti því hafa stækkað og þar með fjöldi kjósenda. Gætið að því!


Skógrækt og skógrækt

Blessað skóglausa landið okkar á eftir að breytast mikið á næstu áratugum. Skógar eru að spretta upp víðsvegar, blettir hingað og þangað, háð ræktunaráhuga einstakra landeigenda. Skógrækt sem þessi mun hafa talsverð áhrif á landslag, hvort það telst gott eða slæmt er smekksatriði. Skógrækt hefur líka áhrif á lífríki. Fuglum fjölgar, nýjar tegundir, gróður breytist.

Það á vafalítið eftir að koma í ljós að víða um land eru skógræktarreitir og spildur sem mynda eyjar í landinu, oft ferkantaðar eyjar sígrænna tegunda eins og grenis og lerkis. Slíkar eyjar eru á undanhaldi víða um heim t.d. í Skotlandi, þar sem aukin áhersla er á að skipuleggja og fella skóga í takt við landslagið. Slík vinna er mjög skammt á veg komin hér á landi en mun þó vera í þróun.

Landeigendur leggja til land í ríkisstyrkta skógrækt. Landið er síðan bundið í þeirri nýtingu næstu áratugina og má ekki nota til annars. Þetta getur í senn rýrt og aukið verðmæti lands. Til lengri tíma eykur það væntanlega verðmætið en til skamms tíma getur þetta hamlað verðmætaaukiningu. Hvort eðilegt er að ríkið styrki skógrækt um 97% má vafalítið deila um og þykir mörgum styrkhlutfallið hátt. Aðrir segja mótframlag landeigandans ærið og því ekki of í lagt.

Pólitískar ákvarðanir stýra skógrækt og hingað til hefur hún verið velviljuð skógræktarverkefnum. Það á örugglega eftir að breytast og því er mikilvægt fyrir þá sem stýra þessu starfi að halda vel utanum það ef þeim er annt um framtíð skógræktarstarfs. Ef í ljós kemur að skógar hér á landi eru illa hannaðir, eftirliti með framkvæmd er ábótavant eða að um veruleg neikvæð áhrif á umhverfi verði að ræða gæti verið fljótt að stöðvast fjármagnsflæðið. Á hinn bóginn á það að vera markmið þeirrar atvinnugreinar sem kennir sig við timbur og trjáafurðir að verða sjálfbær, eins og annarra landbúnaðargreina. Þær mega ekki snúast um að viðhalda sjálfum sér.

Ég er á hinn bóginn þeirrar skoðunar að þeim fjármunum sem veitt er í skógrækt og annan landbúnað eigi að koma í einn pott. Bændur eigi síðan aðgang að því fjármagni til hinna ýmsu verka, sem hafi margþætt markmið í þágu þjóðarinnar. Múlbundnir bændur hér á landi eiga fyrst og fremst möguleika á ríkisstuðningi framleiði þeir mjólk eða kindakjöt. Það er óásættanlegt.


mbl.is Á sjötta milljarð króna til um 800 bænda í skógrækt
Tilkynna um óviðeigandi tengingu við frétt

Öfundsverð?

Hjúkrunarfræðingar fagna væntanlega þessari ráðningu. Hvort hins vegar Hulda er öfundsverð af þessu starfi er annað mál. Eitt er víst, það er mjög ögrandi og það verður spennandi að fylgjast með hvort hjúkrunarfræðimenntuðum einstaklingi gangi betur að rífa upp stemmninguna í hinum vanmönnuðu og undirborguðu umönnunarstéttum á spítala sem er tákn heilbrigðiskerfisins hér á landi.  
mbl.is Hulda forstjóri Landspítala
Tilkynna um óviðeigandi tengingu við frétt

Hagsmunir hvers?

Þetta er gömul lumma. Vissulega eru til lélegar landbúnaðarvörur í "útlöndum". Og vissulega eru til lélegar landbúnaðarvörur hér á landi. Gæðakröfur á íslenskan landbúnaðr eru samt talsverðar og meiri en víða annarsstaðar, enda eru íslenskir neytendur hlynntir íslenskri landbúnaðarframleiðslu og borga talsvert fyrir að njóta hennar, bæði í formi hás vöruverðs og gríðarlegra fjárhæða í styrki. Ég skal alveg viðurkenna að ég veit ekki nákvæmlega út á hvað matvælalöggjöf Evrópusambandsins gengur en ég hef verið í útlöndum og dvalið þar mánuðum saman en er samt kominn heim aftur heill á húfi. Í útlöndum get ég valið vörur, vörur sem eru algert rusl, jafnt sem gæðavöru. Það er síðan mitt val hvort ég kaupi.

Það hefur hins vegar lengi tíðkast hér á landi að segja að íslenskar landbúnaðarvörur séu svo frábærar. Þær eru bara eins misjafnar og erlendis. Ég hef iðulega orðið fyrir vonbrigðum með kjötvörur  sem hér er á boðstólnum, og það gildir um allar kjöttegundir. Íslenskar mjólkurvörur eru margar hverjar þrútnar sykri. 

Hitt er síðan annað mál og ég hef nokkuð sterkar skoðanir á því, að okkur sem þjóð ber að vernda íslenska dýrastofna sem eru um margt merkilegt erfðaefni. Og þar kemur að hinum alvöru innflutningshöftum sem snúast um sjúkdómavarnir. Dýrasjúkdómar eru margir hverjir ekkert grín og erfitt að taka aftur ef þeim er hleypt inn fyrir fjarlægðarvarnirnar sem hér eru fyrir hendi.

Íslensk landbúnaðarframleiðsla er misjöfn eins og annarsstaðar í heiminum. Neytendur eiga að fá upplýsingar um uppruna og framleiðsluhætti, þá geta þeir valið. Á það skortir mikið.


mbl.is Hagsmuna landbúnaðarins verður gætt
Tilkynna um óviðeigandi tengingu við frétt

Haust í nánd

Ég fann það í morgun að það er að styttast í haustið. Loftið var haustkalt og napurt niður Skógarselsbrekkuna. Það verður að komast í berjamó fyrir frost. En frost getur svosem komið hvenær sem er.

Kanínurnar í Elliðaárdalnum eru talsvert fleiri núna en í vor. Spurning hvað gerist í vetur. En þarna eru þær á hörkubeit.

Svo er ýmis trjáviður orðinn ansi mikið umfangsmeiri núna en í vor. Alaskavíðir slútir yfir hjólastíginn í Ljósheimunum, við gömlu blokkina mína þar sem ég ólst upp til 4ra ára aldurs. Víða á kröppum hornum skerða runnar og tré útsýni svo öryggi er stefnt í voða. Og borgin leyfir runnum að vaxa inn á hálfan hjólastíginn þar sem hjólað er frá Glæsibæ niður í Laugardal. Mætti skoða þetta betur. Það þyrfti í rauninni að finna svarta bletti á hjólastígum á höfuðborgarsvæðinu, þar sem beygjur eru of krappar, gróður skerðir útsýni, hætta á árekstrum við gangandi vegfarendur o.s.frv.

En ég ætla mér að hjóla eins lengi og haustið býður mér, og jafnvel að kaupa mér nagladekk. 


Um hvað snúast almenningssamgöngur?

Mér fannst afar fyndið að stjórnendur Strætó leiddu hugann að því að fækka ferðum til að spara í rekstri. Besta sparnaðarleiðin fyrir Strætó væri að keyra bara alls ekki neitt. Nú fer í hönd sá tími sem fólki á ferð á höfuðborgarsvæðinu fjölgar svo um munar, allar götur stíflast af einkabílum, ein manneskja í hverjum. Tímasóun, mengun, stress, slys o.s.frv. veldur miklum kostnaði fyrir samfélagið. Almenningssamgöngur eru ein leiðin til að minnka þann kostnað. Það sem hins vegar vefst enn fyrir flestum sem þurfa að ferðast á milli staða á höfuðborgarsvæðinu er annars vegar að þeir eru miklu mun lengur að ferðast milli A og B í strætó eins og staðan er nú og hins vegar að vagnar ganga oft ekki nema á hálftíma fresti og það að missa af strætó er orðið háalvarlegt mál vegna allra skuldbindinga viðkomandi.

Forgangsatriði Strætó og þ.a.l. sveitarfélaganna er að greiða leið strætisvagna, stundum á kostnað einkabíla en einnig með forgangsreinum sem geta verið hrein viðbót við núverandi gatnakerfi. Það getur verið erfið og sársaukafull fæðing þar sem oft lengjast raðir einkabílanna. Hún er hins vegar nauðsynleg til að breyta hugarfari, breyta lífsstíl. Við þetta fjölgar farþegum og þá má auka tíðni ferða. 

Strætó á að setja sér markmið varðandi ferðatíma. Að flestir komist til og frá vinnu á innan við 30% lengri tíma en þeir gera í dag. Ég er t.d. 50% lengur með strætó í vinnuna en á einkabíl, fljótari að hjóla. 


mbl.is Aukin fjárframlög í stað niðurskurðar
Tilkynna um óviðeigandi tengingu við frétt

Hvernig mótmæla Íslendingar lækkunartregðu olíufélaganna?

Þetta er gömul saga og ný og það verður að segjast eins og er að það er óhægt um vik að láta fæturna velja í þessum vöruflokki sem mörgum öðrum hér á landi. Nánast engin samkeppni er á olíumarkaði hér á landi og neytendur geta sleppt því að kaupa bensín einn dag en verða síðan að kaupa það næsta dag til að verða ekki strand.

Eina færa leiðin er að minnka heildareftirspurn eftir þessu eldsneyti. Það þýðir yfirleitt nýjan lífsstíl, sem við eigum afar erfitt með að temja okkur þó svo hér eigi að ríkja "kreppa". Ég hef t.d. það val að ferðast til og frá vinnu á bíl. Ferðin tekur mig u.þ.b. 10-15 mín. Þess í stað hef ég tekið strætó sl. vetur og notað til þess strætókort sem kostaði um 30 þús og gildir í 9 mánuði. Ferðin tekur um 30 mín. Ég gæti því sparað mér max 40 mín á dag með því að eiga bíl. Í sumar hef ég síðan hjólað nánast á hverjum degi til og frá vinnu. Ferðin tekur 25-30 mín, ca 9 km hvora leið. Þetta er mín heilsurækt.

Aðstæður fólks eru hins vegar mjög mismunandi og margir eiga því mjög örðugt með að hjóla eða ganga. Skutla börnunum hingað og þangað. Fundaferðir í vinnu. O.s.frv.

En svo er þetta oft spurning um viðhorf. Hvað þarf ég t.d. að vinna marga yfirvinnutíma til að borga fyrir rekstur á öðrum bíl, sem ég nýti að meðaltali 30-60 mín á dag? Yfirvinnutíma sem ég annars gæti nýtt með fjölskyldunni. Með því að hjóla eða ganga er líka komin góð hreyfing svo ég þarf varla að nýta mér líkamsræktina, sem tekur líka 1 klst á dag af dýrmætum fjölskyldutíma. Allt er þetta spurning um forgangsröðun.


mbl.is Dropinn dýr þótt verðið lækki ytra
Tilkynna um óviðeigandi tengingu við frétt

Næsta síða »

Um bloggið

Bjössablogg

Eingöngu færslur þegar höfundi liggur eitthvað á hjarta og langar til að létta af sér þeirri byrði.

Höfundur

Björn Barkarson
Björn Barkarson
Vel kvæntur þriggja barna faðir í Kópavoginum.
Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • IMG_5793
  • Moska í Marrakech
  • Forvitnar ungar snótir
  • Öllum heilsað með handabandi
  • Fé á beit?

Heimsóknir

Flettingar

  • Í dag (19.3.): 0
  • Sl. sólarhring:
  • Sl. viku:
  • Frá upphafi: 0

Annað

  • Innlit í dag: 0
  • Innlit sl. viku:
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband