Sameiginlegt mat

Ég er hlynntur því í öllum meginatriðum að fram fari sameiginlegt mat á umhverfisáhrifum framkvæmda eins og ætlunin er að fara í á Bakka. Eftir lestur á úrskurði umhverfisráðherra finnst mér hins vegar rök ráðuneytisins ekkert sérstaklega sterk, einkum að teknu tilliti til þess hvernig Skipulagsstofnun hefur staðið að málinu, sem mér finnst til fyrirmyndar. Þar var komið á mjög efnilegu samráði allra aðila sem miðaði að því að allir þættir fyrirhugaðra framkvæmda væru í gangi á sama tíma, sem myndi auðvela öllum að hafa yfirsýn yfir málið þ.m.t. umsagnaraðilum, Skipulagsstofnun og almenningi. Og það eru í raun meginrök ráðuneytisins að Skipulagsstofnun skortir lagastoð til að þvinga alla framkvæmdaraðila til slíks samráðs.

Ég vil hins vegar benda á það að á Bakkanum hinumegin á landinu fór fram sameiginlegt mat fyrir tvær tengdar framkvæmdir, Bakkafjöruhöfn og Bakkafjöruveg. Þar hefði mátt meta áhrif hafnarinnar sér og vegarins sér, sem hefði í sjálfu sér verið fáránlegt.

En ég á erfitt með að ímynda mér að þessi úrskurður breyti í raun miklu þó að sameiginlegt mat eigi e.t.v. eftir að kristalla betur erfiðleikana við að finna næga orku fyrir álverið.

En nú ætla ég að koma mér út í góða veðrið.

Sandvík í tætlum

Fjölskyldan fór í skemmtitúr um Reykjanesskagann á sunnudaginn, skoðuðum helstu þéttbýlisstaði, Garðskagavita, fjöruna og ókum síðan suður á Reykjanes. Á leiðinni kíktum við í Sandvík þar sem brimið öskraði við ströndina og stelpurnar báðu vinsamlegast um að fá að fara aftur inn í bíl. En það var ekki bara brimið sem öskraði heldur voru þarna metnaðarfullir menn á mótorhjólum sem tættu upp ströndina og melhólana, þeyttu upp sandi og gerðu alla útivist á svæðinu afar lítt sjarmerandi.

Mótorhjólistar hafa greinilega eignað sér svæðið, sem er gamalt landgræðslusvæði og er á náttúruminjaskrá ásamt næsta nágrenni. Ég ákvað að vera ekki að pirra lögguna á þessu væga broti á íslenskum lögum sem varða utanvegaakstur en á þessu sviði er pottur talsvert skemmdur eða brotinn hér á landi. Svo datt mér í hug hvort ekki ætti bara að ánafna vélhjólasamtökum Íslands svæðið til afnota, með þeim skyldum og ábyrgð sem því fylgir. Þeir myndu þá hafa afnot af svæðinu en þyrftu einnig að tryggja verndun svæðisins, þ.e. að það færi ekki á kaf í sand og tjörnin gæti áfram verið búsvæði fugla, þrátt fyrir hávaðann.

Það er greinilega enginn sem sinnir þessu svæði, er vörslumaður þess, vegir eru slæmir, umgengni slæm og engar merkingar.

Við fórum síðan út á Reykjanes þar sem er eitthvert stórfenglegasta sýnishorn af íslenskri náttúru sem til er. Það sinnir heldur enginn um það svæði, vegir slæmir, illa merkt, bílastæði ekki afmörkuð o.s.frv. Þetta er enn eitt sýnishornið af því að náttúra landsins getur orðið eins og þurrsogin mjólkurkýr sem fær afar lítið að éta hjá hirði sínum, og horast upp.

Sumarfríið búið, í bili

Kominn aftur til vinnu eftir ágætt sumarfrí sem að mestu var tekið út í sveitinni, eins og það er oftast kallað á mínu heimili. Tekið á því, girðingarvinna, mála þak, smá heyskapur, smíða pall o.fl. Dálítil veiði en fulllítil til að láta staðar numið. Stefni því á að veiða eitthvað einhversstaðar um Verslunarmannahelgina. Ég fann fyrir því að vera alveg tilbúinn að fara aftur að vinna, sem er jákvætt.

Svo tókum við upp á því að panta ferð til Portúgal í september. Þangað hef ég aldrei komið. Þetta verður svona fjölskylduferð og framlenging á sumrinu.

Sumarfrí

Jæja nú er maður kominn í sumarfrí. Áheitin eru að fara í útilegu, veiða svoltið með stelpunum og gera svo eitthvað gagn heima í sveitinni. Gera við nokkrar girðingar, mála þök og kannski smíða pall. Sný svo aftur rétt fyrir mánaðamót.

Erfið samningsstaða

Hjúkrunarfræðingar eru í þeirri afleitu stöðu að boði þær vinnustöðvunskapast neyðarástand, þannig að kalla má þær til vinnu. Þær eru því ekki í góðri stöðu til að þrýsta á um launahækkanir. Yfirvinnubann yfir sumartímann mun væntanlega hafa lítil áhrif og reyndar skapa ýmisskonar erfiðleika fyrir hjúkrunarfræðinga sjálfa. Eina leiðin sem virðist vera fær, samanber aðgerðir skurðhjúkrunarfræðinga í vor, er að leggja niður störf, segja upp. Þá kemur loksins í ljós hvers virði þessi stétt er velferðarsamfélaginu svokallaða. Hjúkrunarfræðingar hafa gefið skýr skilaboð um að þessi 20 þúsund kall sem ríkið býður er óásættanlegur. Það er ekki eftir neinu að bíða.

Engin niðurstaða á fundi hjúkrunarfræðinga

Brúðkaupsafmæli

Við hjónin eigum átta ára brúðkaupsafmæli í dag. Ég var með þetta allt á hreinu, mundi eftir þessu af miklu öryggi. Við borðuðum í Turninum á 19. hæð. Það var ágætist útsýni, reyndar bara svipað og heima hjá okkur. Gluggarnir dálítið skítugir. Þjónustan var að mestu ágæt og maturinn góður. Ég hef dálítið velt því fyrir mér af hverju maður getur farið á hádegisverðarhlaðborð og borgað innan við 3000 kall fyrir og svo fer maður út að borða að kvöldi, fær slappa þjónustu, og lala mat og þarf að borga minnst 5000 kall fyrir.

En allavega ef einhver vill fara á hádegishlaðborð með útsýni þá er 19. hæðin ágætur kostur.

Og til hamingju við. 

Cillit Bang á dönsku

Frábært að fá auglýsingar á dönsku! Svosem frekar lágkúrulegt að það sé Cillit Bang en þetta er miklu betra en mímaðar. Svo er gott að halda þessu bráðskemmtilega máli á lofti í íslensku samfélagi. 14 ára frændi minn skilur ekki til hvers á að læara dönsku en ég sagði honum að það væri til þess að njóta þess í botn að vera í Danmörku, annað ekki. En það væri fyllilega þess virði. Cillit Bang auglýsingar eru vatn á milli dönskuaðdáenda og er það vel. Cillit Bang over hele huset.

Gríman sjónvarpsefni?

Leit með öðru auganu á útsendingu frá afhendingu Grímuverðlaunanna. Ég er eiginlega orðinn þeirrar skoðunar að þessi árshátíð eigi ekki beint erindi í ríkissjónvarpið frekar en lokahóf KSÍ. En það er nú bara mín skoðun.

Grímuhátíðin áfallalaus

Margþætt áhrif

Þessi breyting á olíuverði gæti haft varanleg áhrif á verðmætamat í okkar neyslusamfélagi. Það að þeysa á milli staða með litlum tilkostnaði, verður ekki eins sjálfsagt. Stórir og þungir bílar verða ekki eins vinsælir. Dregið gæti úr ferðum um hálendið. Forgangsröðun ferða verður önnur. Kannski minnka skreppin.

Ég hef sjálfsagt svipaðar áhyggjur af þessari hækkun og aðrir og geri mér grein fyrir að þetta er afar erfitt í atvinnurekstri, fyrir verktaka, bændur og aðra atvinnurekendur. En almennt talað er ég þeirrar skoðunar að það sé tímabært fyrir okkur að hugsa málin upp á nýtt. Í raun má búast við að hækkanir á olíuverði geti verið góðar fyrir fjölskyldulíf. Fólk er minna á ferðinni, e.t.v. meira saman. Einnig gæti þetta verið gott fyrir lýðheilsu. NOta hjólið í stað bílsins, labba, hlaupa o.s.frv. En áhrif á hagvöxt verða sjálfsagt heldur neikvæð. En hvað segir hann okkur svo sem.

Dregur úr bílaumferð

Vorboðar í Miðfirðinum

Skruppum í sveitina um helgina sem þykir ekki í frásögur færandi nema að nokkuð er nú um liðið síðan síðast. Það er ekki að spyrja að því á þessum tíma að fuglar setja hvað mestan svip á íslenska náttúru á þessum tíma árs. Karlfuglar uppfullir af hormónum sem knýja þá til allskyns æfinga til að ganga í augu kvenkynsins. Fyrir norðan kvað mest að heiðagæs, hrossagauki, stelki, skógarþresti og heiðlóu. Svo sá ég einn lítinn steindepil, sem er nú ekki mjög algengur á þessu svæði. En þessi kynþrungna spenna er engu lík og maímánuður er frábær til að njóta íslenskrar náttúru. Persónulega fannst mér aðeins of kuldalegt fyrir blessaða fuglana en þessi losti heldur vafalítið á þeim hita.